Библиотека

Молитвы Прп. Елиазару Анзерскому


Преподобному Елеазару Анзерскому

(13/26 января)

Тропарь, глас 3

 


 

Отверг плоти тленная,/ нетленных потщался еси достигнути,/ и, мира удалився,/ вселился еси в морский остров,/ и на нем усердно многа лета Господеви поработал еси,/ сего ради и дары прозрения и чудес обогатился еси,/ отче Преподобне Елеазаре,// Христа Бога моли даровати нам мир и велию милость.

Кондак, глас 2

 

Воздержанием и труды постническими душу предочистив,/ храм Пресвятаго Духа был еси,/ желанием крайним ум очистив/ с вышними ликостоянии в вышних Богу предстоиши,/ наслаждаяся ясно Божественного осияния/ и приемля красная воздаяния за труд мног,/ иже в теле на земли показал еси,// молися, Преподобне Елеазаре, непрестанно о всех нас.

 

Кондак 13 акафиста:

 

О преподобне и богоносне отче наш Елеазаре! Приими ныне приносимая тебе хваления наша, и святыми твоими молитвами в жизни сей нас от всякаго злаго обстояния сохрани, в будущей же вечнаго осуждения избави, да сподобимся купно с тобою и со всеми святыми воспевати в Троице славимому Богу: Аллилуиа.



Молитва

О преподобне отче наш Елеазаре, безмолвнаго иноческаго жития в пустыни Анзерстей богоизбранный начальниче и основателю! Молим тя мы, смиреннии и недостойнии, обстояще священный гроб твой во храме Пресвятыя Троицы, ими же место сие освятися и, сущия ради в тебе благодати пророческия, прославися; испроси, угодниче Божий, у Вседержителя Бога, в Троице поклоняемаго, Ему же в дерзновении с лики святых предстоиши, да дарует православному народу нашему на враги победу и одоление, державе Российстей мир и утверждение, церквам благостояние и всем людем тишину, и благоденствие, и изобилие плодов земных. Угаси молитвами твоими разжженныя на ны стрелы диавольския, да не прикоснется нам злоба вражия, да благочестно скончавше временное житие, сподобимся наследовати Царствие Небесное и купно с тобою славити Отца и Сына и Святаго Духа во веки веков. Аминь.

 

 

 

Ублажаем тя,/ преподобне отче наш Елеазаре,/ и чтим святую память твою,/ наставниче монахов и собеседниче ангелов.